تحذير هام جدا بخصوص ...TVI Express

السلام عليكم ورحمة الله وبركاته




في اكثر من موضوع إتكتبوا عن شركة إسمها TVI Express



نظام الشركة إنك بتشتركي فيها بملبغ 1600 جنيه مع الوعد برحلة سفر 4 ايام لفردين والإقامة في فنادق



ومطلوب منك تجيبي تحتك شخصين او تلاته ... وبتاخدي عمولة مرة يتقال انها 250 دولار ومرة يتقال انها 500 دولار



وكل شخص جبتيه مطلوب منه يجيب ناس تحته وهكذا



والشركة بتقول عن نفسها انها ليست تسويق شبكي ومش هرمي وان الهرمي حرام انما الشبكي مش حرام !!!



طيب نمشي كده مع بعض واحدة واحدة ... حافترض إنك أستاذة في التسويق وحتقنعي ثلاثة او اثنين يشتركوا تحتك إنتي كده ما اخدتيش حتي فلوسك ...وعشان تاخدي فلوسك لازم الثلاثة اللي تحتك يجيبوا ناس تحتهم وده شيء مش مضمون



علي المستوي الشخصي يا أختي فكري كده شوية ...اي تسويق هرمي الناس اللي في قمة الهرم هي اللي بتكسب مكاسب رهيبة علي حساب الناس اللي في القاع ...وبيجي وقت ميتباعش ...وفي الحالة دي اللي بيخسر فلوسه اللي في قاع الهرم




طيب علي المستوي الأكبر بأه علي مستوي المجتمع ...إيه العائد من النشاط ده علي المجتمع ؟ صنعتي حاجة ؟ انتجتي حاجة ؟ قدمتي خدمة ؟ بعتي سلعة او خدمة بسعر يتناسب مع قيمتها الحقيقية؟ لا ولا أي حاجة ... انتي لو كسبتي بتقبضي مقابل إنك ومعلش متزعليش من الكلمة "دبستي " شخص تاني



واحدة حتقول طيب انا حاجازف واجرب ...لا لأ إستني اصل إنتي مش واخدة بالك ...هي الشركة دي مصرية؟ لأ



طيب عربية ؟ لأ



طيب لها مقر فى مصر ؟؟ برضه لااااااااا



موقع الشركة اللي باللغة العربية مكتوب فيه ان مقرها قبرص .... وما ادراكم ما قبرص ...المشهورة بقضايا كتير في غسيل اموال ...وتعتبر واحة الأستثمارات غير المشروعة ...إعملي بحث في جوجل عن غسيل الأموال في قبرص



يعني احنا في عز الأزمة الإقتصادية الطاحنة دي حنطلع فلوسنا برة مصر؟؟ أي فلوس بتطلع برة بتقلل من قيمة الجنيه وبتضر الإقتصاد ....وكل ده عشان نصابين برة بيضحكوا علينا ؟




يا اختي يللي عندك إستعداد تدفعي 1600 جنيه في المجهول فكري في إستثمار يخدم بلدك ...الثلاثة اللي حتجبيهم وتدوا اكثر من 6000 جنيه لناس مجهولة بدون عائد عليكي ولا علي مجتمعك إعملي معاهم مشروع يفيدك ويفيد بلدك



فكري كده وإعقليها ...



وبالمناسبة نتكلم إزاي نفرق بين التسويق الحقيقي وبيع الوهم والنصب




هل الشركة يعتمد ربحك فيها بصفة أساسية علي انك تجيبي ناس تحتك "فقط" ؟ ايوه تبقي شركة تسويق هرمي



هل الشركة متقدريش تبيعي منتجها او خدمتها لشخص عادي غير "مشترك"؟ ايوه تبقي شركة تسويق هرمي



تعالوا نشوف برة إمتي بيعتبروا الشركة شركة تسويق هرمي ومخالفة؟ مثلاً هيئة حماية المستهلك في امريكا بتعتبر الشركة هرمية إذا كان اكثر من 30% من المستهلكين أعضاء في الشركة وبيدفعوا رسم إشتراك او عضوية



تفتكروا بالطريقة بتاعة TVI Express دي نسبة المشترين الأعضاء كام ؟ أعتقد 100% !!



طيب إيه الفرق بينها وبين شركات زي افون واوريفلام وماي واي وغيرها؟



ما هي الشركات دي بتعرض منتجات وفيها عضويات والعضوات بياخدوا عمولة علي جذب عضوات تانيه ...طيب إيه الفرق بأه؟



الفرق إن الشركات دي :



1- عندها منتج او خدمة حقيقية معروفة



2- العضوة اللي بتشترك في الشركة ممكن تبيع المنتج لناس عادية غير أعضاء



3- لو جابت أعضاء تحتها بتاخد عمولة علي مبيعاتهم بس مش هو ده مصدر ربحها الوحيد



ارجع تاني لموضوع TVI Express بصفة خاصة



ده رابط لموقع هيئة حماية المستهلك في أستراليا وفيه قرار المحكمة الأسترالية بخصوص الشكوي المقدمة ضد الشركة من هيئة حماية المستهلك الإسترالية والذي إنتهت فيه المحكمة إلي ان الشركة من شركات التسويق الهرمي المحرم نشاطها وفق القانون الإسترالي....



http://www.accc.gov.au/content/index...itemId/1019724



والمشاركة الجاية فيها الترجمة

تحياتي / محمد عزازي
يا جماعه انا قولت الموضوع ده واجري علي الله
ارجوا من الجميع اضافه الردود الموضوع مفتوح واي حد يقدر يضيف رد

تم إدانه كلاً من تيدي جستن وتينا بولين وديفيد سكانلون بتهمة خرق القوانين التجارية من خلال العمل بما يسمي TVI Express



ثبت للمحكمة قيام السيده جستن بتحويل 296958 دولار خارج أستراليا في الفترة من فبراير 2010 إلي مايو 2010



وتأكد القاضي نيكولا من أن هذه الأموال حصيلة الإشتراكات من العضويات



وليس هناك اي شك ان السبيل الوحيد للمشترك للحصول علي أرباح من TV Express هو قيامه بجذب أعضاء أخرين للإشتراك



والتسويق الهرمي قد يتم من خلال ان يقوم العضو بدفع مبلغ العضوية لشخص اخر مشترك مع الإتفاق علي ان العضو الجديد سيحصل ما دفعه جزئياً او كلياً من أعضاء أخرين يقوم بجذبهم للإشتراك



وتطلب الشركة من المشتركين سداد مبلغ 330 دولار كرسم إشتراك وبعد ان يتم السداد يحصل علي كوبونات للسفر بالإضافة إلي حصوله علي عمولة عن كل شخص يقنعه بالإشتراك



ومن ذلك فالشركة تعتمد علي التسويق الهرمي ويتجلي ذلك من خلال ان الأرباح والمزايا التي يحققها العضو تعتمد بصفة رئيسية علي عدد الأشخاص الذي يقوم بإقناعهم بالإشتراك



وأضاف القاضي ان النظام الموضوع للشركة يجعل من الصعب جداً إن لم يكن من المستحيل ان يستفيد العضو من كوبونات السفر المزعومة وبذلك تصبح غير ذات قيمة



هذا وقد تم الترويج TVi Express عبر مواقع عديدة وعبر صفحات الفيس بوك في داخل أستراليا وعلي المستوي الدولي



وثبت للمحكمة ان المتهمين الثلاثة ضللوا الأخرين من خلال الإيحاء بأن الشركة علي علاقة بشركات سياحية معروفة علي خلاف الواقع



و لذلك ُقبلت الدعوي وسيتم النظر في العقوبات والتعويضات التي تقترحها الجهة الشاكية (هيئة حماية المستهلك بأستراليا)




صدر في 30 نوفمبر 2011